Moqdisho,(insidesomalia.org)- Warar ku dhowdhow xarunta Madaxtooyada Villa Soomaaliya ayaa sheegaya in Madaxweynaha Dowladda Federaalka KMG ah ee Soomaaliya Cabdullaahi Yuusuf Axmed iyo Jen. Maxed Siciid Xersi (Morgan) ay si weyn oo aan horay loo arag isugu khilaafeen sida laga yeelayo iyo qaabka loo wajahayo weeraro lala kaashanayo ciidamada Itoobiya oo lagu qaado Jubbooyinka, iyadoo labada nin ay maalmahan kulamo gaar ahi ka lahaayeen arrintaasi.

Ilo warkeed si weyn ula socday kulamadaasi ayaa inoo xaqiijiyey in Taliyaha ciidamada Itoobiya ee ku sugan Soomaaliya oo ku soo biiray kulanka labada nin uu sheegay in ciidamadoodu aaney wax dagaalo ah ku qaadi karin Jubbooyinka xilligan, maadaama roobo badan ay ka daéen deegaanadaasi, jidadkuna aaney hagaagsaneyn, wuxuuna sheegay in marka ay ku haboonaato in ay dagaalo ku qaadaan goboladaasi in uu horkici doono Jen. Morgan, waxaana arrintaasi gaashaanka ku dhiftay Cabdullaahi Yuusuf oo sheegay in cidda keliya ee lagala tashanayo arrinta Jubbooyinka in ay tahay Taliyaha Guutada 1aad ee Ciidamada Dowladda Col. Cabdirisaaq Afgaduud.

Taliyaha Itoobiyaanka ayaa sheegay in aagag badan ay Ciidamadoodu dagaalo kaga furan yihiin, isla markaana aaney u babac dhigi Karin weerarada lixaadka leh ee uga imaanaya kooxaha kacdoonka, wuxuuna ka codsaday Madaxweynaha in la sameeyo Ciidamo ay yeelato Dowladda oo kala wareega ammaanka qaar ka tirsan gobolada Soomaaliya.